Det skjer på Fogn i jula!

Julafta - kl. 13.00

Gudsteneste ved Anders Kvalevåg
Song ved Fognakoret og Emma Grønås
Takkoffer til Talgje sokn sitt misjonsprosjekt

1. Juledag - kl. 12.00

Høgtidsmøte på bedehuset
Andakt ved Håvard Østhus
Kollekt til hjelpeprosjektet "Redeemed in Zion"
Diverse innslag

2. Juledag - kl. 12.00

Høgtidsgudsteneste v/Anders Kvalevåg
Song ved Fognakoret og Ester Alida og Inga Katrine Vold
Nattverd og takkoffer til Kirkens nødhjelp

3. Juledag - kl. 18.00

Søndagsskulen sin juletrefest på bedehuset
Andakt av Ester Alida Vold
Elles vert det gong rundt juletreet, godtepose til borna, kaffi, kaffimat ++

29. Desember - kl. 15.30

Romjulsmarsj med oppstart ved skulen. Marsjen er ca. 5 km. lang. 
Startkontingent kr 50,- per person eller maks kr 150,- per familie.
Servering av gløgg og pepperkaker etterpå.
Hugs refleks! (arr: Fogn IL)

29. Desember - kl. 19.00

Volleyballcup i gymsalen
Alle frå og med 8. klasse kan vere med, og melde på lag til Jakob Bø på tlf 99014338. Frist for påmelding er 28. desember. Klikk HER for reglar.
Det vert kiosksal. (arr: Fogn IL)

Hjarteleg velkomne på alle arrangement! God jul!

Flott juleavslutning!

View fullsize

Birk er ein av fire som skal starte på skulen hausten 2014.

Torsdag 19. desember var det julefest på Fogn oppvekstsenter. Dette er ein tradisjonsrik fest, men nytt av året  var at borda var sett opp i gymsalen, slik at juletregongen foregjekk ute i foajeen. Elles var det mykje "same procedure as every year",  der barnehageopptreden, skodespel frå skuleklassane, innskriving i skulen, julesong, matøkt og juletregong nok ein gong var bærande elementer!

Halvard Bøe knipsa mange flotte bilete frå det som skjedde denne kvelden. Tusen takk skal du ha for bileta som vi kan sjå i serien under!

Romjulscup i volleyball

Fogn IL har allereie fått påmeldingar til årets romjulscup i volleyball. Til alle som går med planar om å melde på lag, kjem det her viktig informasjon om cupen, og om korleis ein melder seg på.

Cupen blir arrangert, i gymsalen, søndag 29. desember i tidsrommet 19.00 –  23.00(ca). 

Reglane for lagsamansettinga : 

• Aldersgrense 8.kl
• Mix av damer og menn.
• Minimum 6 spelerar, fritt antall innbytterar.
• Det skal vere minimum to frå kvart kjønn, blant spelerane, på banen.

Meld på med namn på laget, og namn på personane på laget, til idrettslaget ved Jakob. Send sms til 99014338, mail til jakobboe@gmail.com eller ta kontakt på anna måte. 

Fogn idrettslag

Vi song jula inn!

View fullsize

Emma Grønås syng solo med Tøff og Nådig i bakgrunnen.

Søndag 15. desember var dagen då mange på Fogn fekk skikkeleg julestemning! Då vart nemleg jula sungen inn i kyrkja, og både juletre og julesongar var på plass! Mange hadde møtt opp og fekk høyre flott song av barnekoret Tøff og Nådig, Fognakoret, Dag Olav Sæbøvåg og tvillingane Sarah og Leah Sandanger. I tillegg var det mykje fellessong, der alle songane var henta frå den heilt nye salmeboka. I denne har mellom anna Alf Prøysens "Julekveldsvise" fått plass, og organist Unni S Vignes fortalte historia bak både denne og "Du grønne glitrende tre god dag" før dei vart sungne. 

Etter seansen oppe i kyrkja var det kaffi, kaker og klementiner i kjellaren, der stemningen var stor med både pratesjuke vaksne og ungar som gjerne fekk vere oppe litt lengre enn vanleg denne kvelden...

Under er eit klipp frå då tvillingane song, og tre bilete frå kvelden.

Juleverkstad på skulen

Torsdag og fredag i veke 50 var det tid for årets juleverkstad på Fogn oppvekstsenter. Dette er ein lang tradisjon, og i år kom elevane heim med eigenproduserte kaker, kransar, esker og sjølvdyppa lys! 

Barnehagen bidrog med Lussekattar på fredag, då dei kom gåande inn i flott Lucia-tog. I tillegg var desse yngste borna på oppvekstsenteret med på den årvisse julegrauten i lunsjtider på fredag. Stor stas og god stemning!

Nokre av bileta under syner elevane i stor aktivitet i gymsalen. Dette er eit av høgdepunkta kvart år, nemleg opp til ein time stikkball i gymsalen ved slutten av kvar økt... 

Kva er nytt?

View fullsize

Det har gått nesten fire år sidan Fogn.org vart lansert, 17. mars 2010. Sidan den gongen har sida sett meir eller mindre heilt lik ut, og det er på høg tid med ei oppdatering. Nokre av dei viktigaste endringane kan du lesa om under.

Betre støtte for smarttelefon og nettbrett
I mars 2010 var det ingen som hadde nettbrett, fordi Apple sin iPad ikkje var lansert enno...  I dag kjem omlag 50% av besøka til Fogn.org frå smarttelefonar og nettbrett, og det er viktig at desse får same funksjonalitet som besøkjande frå PC. Den nye sida er dynamisk og endrer storleik på bilete, tekst og layout, alt etter kor stor skjerm du besøkjer oss på. I tillegg skal alle no kunne sjå seriar med bilete som vert lagt ut, noko som ikkje var tilfelle med den gamle løysinga.

Kommentarar
For snart to år sidan prøvde vi oss med kommentarfunksjon under sakene på gamle Fogn.org. Denne funksjonen vart brukt av fleire, men på grunn av tekniske utfordringar på den gamle sida forsvant denne moglegheiten nokså fort. No er det igjen mogleg å kommentera dei ulike sakene som vert lagt ut. Dei som ynskjer å nytte seg av dette kan logge inn med Facebook, Twitter eller Googlekontoen sin når dei legg inn kommentar. Om du ikkje nytter nokon av dei tre alternativa, kan du registrera deg som brukar av kommentarfeltet ved å klikka alternativet "Squarespace" når du vil legga inn kommentaren din. Alle kommentarar vert godkjent av moderator før dei vert publiserte på Fogn.org. Det tek normalt ikkje meir enn ein time frå ein kommentar er lagt inn, før den er gjort offentleg på sida vår. Resten av reglane for kommentarar kan du lese ved å klikke HER.
Om du ynskjer å få beskjed om nye kommentarar under ein eller fleire saker, kan du klikke på "subscribe via e-mail" etter at du har klikka på "comment".

Deling på Facebook og Twitter
Nye Fogn.org har utvida støtte for sosiale medier. På alle nye innlegg finn du ein knapp det står "share" på, noko som gjer at du lett kan "lika" innlegget på Facebook og Twitter.

Instagram og Twitter på framsida
Nede på den nye startsida ligg det to nye felt, merka med "Fogn.org på Instagram" og "Fogn.org på Twitter". Her kjem dei siste innlegga til Fogn.org på desse to sosiale mediene automatisk opp. Dette er ein kjapp og enkel måte å få ut informasjon og enkle bilete på. Har du eit bilete som burde vore lagt ut på Instagramkontoen vår, er det berre å merke det med @fognorg, så vil biletet kunna bli publisert i løpet av kun kort tid.

Lamma frå den gamle sida har no blitt bytta ut

Kosmetiske endringar
Dei gamle lamma har mista plassen sin til fordel for ein nye heading som syner dei fire årstidene på Fogn. I tillegg ligg menyen no vassrett under headingen, i staden for i ei liste til venstre på sida, slik det var før. Det er i tillegg fleire små endringar reint utsjånadsmessig, som til dømes nye bilete til lenker med oppdatert ruteinformasjon, lenke for vèrmelding ++.

Meld inn arrangement frå kalendersida
Hjartet i Fogn.org er kalenderen. Denne har ein sentral plass òg på den nye sida, og ei liste over komande arrangement ligg på framsida. I tillegg kan du klikke på menyvalet "Kalender" for å få opp enno fleire arrangement. På botnen av denne sida, er det lagt inn eit skjema der folk kan melde frå om arrangement som skal inn på kalenderen. Før måtte folk nytte menyvalet "kontakt oss" for dette.
 

Dette var ei oversikt over dei største endringane på nye Fogn.org. Vi set stor pris på tilbakemelding, tips og råd frå brukarane våre! Dette kan skrivast inn som kommentarar under denne saka, eller meldast via menyvalet "kontakt oss".