Marsjera i helga?

Foto frå Fognamarsjen 2012

Søndag 17. august vert Fognamarsjen arrangert for 26. gong på rad! Marsjen vert gjennomført på tradisjonelt vis med start/mål ved skulen, og turen går dei omlag 10 kilometrane rundt øya. Starten går mellom klokka 15.00 og 16.00 og startkontingenten er på 75,- per deltakar og maks 225,- per familie. 

Det vert høve til kjøp av brus/sjokolade ved Selvåg. 

Det er berre to personar, Anders Sandanger og Jakob Bø, som har gått alle dei 25 tidlegare fognamarsjane. Sjølv om du kanskje ikkje kan måla deg med desse, skal du vite at premiering er innan rekkevidde for alle, noko premieringsoversikta under syner:

1. gong: Bronsemedalje

5. gong: Sølvmedalje

10. gong: Gullmedalje

15. gong: Elitestaup

20. gong: Endå eit staup

25. gong: ???

For å sjå kor mange gonger du og alle andre har gått marsjen kan du klikka HER for å få ei fullstendig oversikt.

Fogn IL ynskjer nye og tidlegare deltakarar velkommen til ein vonleg fin søndagstur rundt øya!

Innspel til kommuneplanen?

Finnøy Kommune rullerer i desse dagar samfunnsdelen av kommuneplanen. Det er denne delen av planen som legg føringar for samferdsel, arealforvaltning, oppvekst, kultur og andre viktige aspekter i kommunen. Kommunen inviterer no til 2. gongshøyring på planen, som skal gjelde frå 2014-2026. 

Sjå planutkastet ved å klikke HER, og sjå kva kommunen sjølv skriv ved å klikke HER.

Alle som ynskjer kan kontakte kommunen direkte og kome med sine tilbakemeldingar. Samstundes er Fogn grendalag invitert til å kome med tilbakemeldingar, og det er mogleg å gå via dei for å få gitt sine innspel til kommunen. Grendalaget skal utforme eit skriv til kommunen, på bakgrunn av tilbakemeldingar dei har fått. Frist for å gi innspel til grendalaget er 6. august og desse kan spelast inn til leiar Kristoffer Østhus på telefon 970 90 902 eller mail kristoffer@osthus.as.

Fognfast?

Tysdag kveld var det litt av eit hovudoppslag på Stavanger Aftenblad sine nettsider. Vi kunne lese tittelen: «Slik kan Fogn bli landfast», under eit kart som synte ulike trasear som kunne gjere dette mogleg. Det heile dreier seg om ei bacheloroppgåve skrive av Stefan Afradi, der han meiner at det skal vere mogleg å kople både Fogn og resten av Fisterøyane opp til fastlandet (via Finnøy) for under 2,2 milliardar kroner. 

Les saka på Aftenbladet.no ved å klikke HER, eller les heile oppgåva til Afradi ved å klikke HER.

Olsokbål i Skinnvigå, tysdag 29. juli

I og med at St. Hansfeiringa i 2013 vart av det våte slaget, vart det aldri skikkeleg fyr i bålet som var dratt saman i Skinnvigå. Heldigvis kjem bålet no til sin rett, då det er bestemt at dette vert årets Olsokbål, som vert tent ca. kl. 19.30 tysdag 29. juli. Det er formann i Fogn IL, Heidi Bø Sangedal som melder dette til Fogn.org. Det er, etter det underteikna kjenner til, ikkje lang tradisjon for Olsokbål på Fogn. Markeringa av denne dagen, som skal vere dødsdagen til Olav den Heilage som fall i strid på Stiklestad i 1030, sto sterkast i Middelalderen, men er i ferd med å verta ei populær feiring att i våre dagar. Les meir om Olsokfeiring ved å klikke HER.

God tur!

I over eit år har det vorte jobba mykje med turstiane på Fogn. Stiar har blitt merka med blå stolpar, gjerdeklyvarar har blitt plassert ut, og no har det også blitt sett opp flotte informasjonskilt på strategiske stader knytta til turstinettet vårt. Ei tavle med eit stort kart og skriftleg informasjon er sett opp ved ferjekaien. Dette kartet kan de sjå nærare i serien med bilete i botnen av denne saka. Fogn.org vil berømme både Fogn IL, Grendalaget og spesielt Malvin Sandanger som har jobba mykje med turstiane. I tillegg må det nemnast at turstiane har fått økonomisk støtte frå både Finnøy Kommune og Gjensidigestiftelsen.

Under kan du sjå bilete av dei nye skilta, og så vil vi oppfordre lesarane til å utforske dei flotte turstiane på eiga hand!

Skilt på Sæbø

Skilt på Sæbø

Skilt på Varland

Skilt på Varland

Skilt på Erås

Skilt på Erås

Skilt ved butikken

Skilt ved butikken

Skilt ved ferjekaien

Skilt ved ferjekaien

Skilt ved ferjekaien

Olav Østhus vann tippekonken!

Fotball-VM i Brasil går er over, noko som også er tilfelle for Fogn.org sin tippekonk knytta til meisterskapet. Det var til slutt Olav Østhus som stakk av med sigeren, og som kan smykke seg med tittelen: "Fogns beste fotballtippar", i alle fall fram til EM i fotball 2016...  Fogn.org har enno ikkje fått kontakt med Olav, men vil prøve å få ein kommentar og overlevere den innramma resultatlista, som eit synleg bevis på den store bragda. Klikk HER for å sjå korleis det gjekk til slutt med alle som var med i konkurransen. 

Dette skreiv vi før finalane i VM:

Olav Østhus ligg på 1. plass i konkurransen, og vinn enkelt og greit dersom Tyskland går sigrande ut av finalen mot Argentina.

Bjørnar Svellingen ligg på 3. plass, men vil sansynlegvis ta sigeren dersom Argentina vinn finalen mot Tyskland.

Dei einaste som kan hindra Bjørnar i å ta sigeren dersom Argentina vinn finalen, er duoen Trond Arne Borgemyr og Lionel Messi. Trond Arne har nemleg tippa at Argentina vinn VM og at Messi vert toppskårar. Dersom dette slår til (Messi må minst skåre to mål i finalen) vil han avansere frå sin 6. plass og heilt opp til toppen av lista.

Elles kan det nemnast at ingen av dei tre "vinnarkandidatane" har sjanse til å få poeng i bronsefinalen, då dei har tippa at denne vert vunnen av lag som ikkje er med i den aktuelle kampen. Olav Veland Thu er den einaste av deltakarane i toppen som kan få poeng i bronsefinalen, då han har tippa Nederland som vinnar av denne. Diverre for Olav har han tippa Brasil som vinnar og Neymar som toppskårar, noko som gjer at han ikkje kan vinna tippekonken totalt sett.

Då gjenstår det ei fin helg med fotball før vi får svaret, både på kven som vinn fotball-VM, og ikkje minst kven som vinn Fogn.org sin tippekonkurranse...